فياجرا مغشوش !!!

قبل 3 سنة | الأخبار | اخبار الوطن

نشرت صحيفة عدن الغد مقال للكاتب خالد محمد شمسان ، تحت عنوان " فياجرا مغشوش " ، تحدث فيه عن تجربة جارة الذي شرب منشط جنسي ، أثر على صحته ، وكاد أن يفقد بسببها حياته نعيد نشر المقال كما ورد في صحيفة وموقع عدن الغد :  الكاتب : خالد محمد شمسان .

صحيت الساعة واحدة على صوت حاد وقوي للحجة جوهرة : يامسلمين الحقونا واستمرت تصيح وانا نوم وحالتي حالة والحرمة تقول لي : حرام عليك روح شوف وانا اقول لها : خليك الفضاله يمكن زوجها عبد القادر ضربها لانها لسانها طويل وطول الوقت تناجم الناس ومؤذية. 

بعدها بقليل سمعت دقوق على الباب قمت فتحت لقيت الحجة جوهرة تبكي ومشعتله تقول : اني افدالك ياخالد تعال شوف عبد القادر دوخ فجأة ولا طلع نخس لاعاد يكون مات..قلت : اقدمي بالبس وبااجي ..

لبست بسرعة ورحت عندهم لقيت لك الحاج عبد القادر مسدوح على الأرض ولايطلع نخس وعيونه مفنجله بدون حركة قلت في قلبي اكيد الراجل قندل ..

حملناه في سيارة جارنا حسام ونقلناه الى مستشفى الصداقة قالوا انقلوه الى مستشفى خاص هنا اطفال فقط اخدناه مستوصف الحصيني ونقلوه للانعاش لان حالته خطيره ودخل في غيبوبة قد تنزله القبر انتظرنا حتى خرج الطبيب المناوب سألته : كيف حاله ؟؟ رد : انت تقرب له ؟ قلت له : جيران قال : اشتي اعرف ايش شرب من دواء ؟ قلت : مااعرف لكن بااسأل حرمته قال : حالته ماتطمن لكن اذا له نصيب بايتحسن .

تركنا عند عبدالقادر مرافق ورجعت البيت صليت الفجر ونزلت الى عند الحجة جوهرة وقلت لها : الطبيب يقول انه شرب دواء ايش اسمه ؟؟ قالت : هو عنده ضغط وسكر ويشرب دواء كثير مالي علم ايش من نوع .. ؟؟ قلت لها : اتأكدي تمام حالته تعبانه ..

قالت : تشتي الصدق كان مخزن وسامرين ولافيبه حاجة شفته شرب حبتين دواء من هذا ( اعطتنا الشريط الفاضي ) وبعدين بعد ساعة قام بدور قلة خير وحصل صياح بيننا ومادريت الا وهو ارتشخ لك ادبج على الارض ..

قلت لها : باوري الطبيب الشريط وهو بايعرف ايش اسم الدواء . خرجت من عندهم وذهبت الى المستشفى وفي الطريق قرأت اسم الدواء وطلع اسمه زواجرا صناعة يمنية مثل الفياجرا ..

لما سلمت الشريط للطبيب مسك على رأسه وقال : حبتين دا مجنون نصف حبة كثير عليه الحمدلله حالته اتحسنت وصحي وباننقله للقسم العام ..

روحت وانا تعبان بس ميت من الضحك على الحاج كان الفحل بايروح فطيس من بعد الزواجرا ..

بعد يومين خرج ولقيته قلت له : ايش صنف لك ياحاج تعمل كذا وانت مريض ؟ قال لي وهو يضحك : مالك ومال عاره الطبيب دا غشيم طول بها وعرض بها وانا والف اشرب حبتين لما اصنف ولايستوي بي حاجة حتى اسأل الحجة جوهرة ..

ضحكت لما دوخت وقلت له : شوف مرة ثاني والله لو تصيح حرمتك لما يضيع صوتها مااجاوبها يافحل ..

هيااا مع السلامه...!!)